山歌

　　（卷五杂歌四句）

　　［风］
　　情哥郎好像狂风吹到阿奴前。揭袄牵裙弗避介点嫌。姐道我郎呀。你道无影无踪个样事务看弗见捉弗着也防备别人听得子。我只是关紧子房门弗听你缠。
　　［又］
　　结识私情好像风。只为你南北东西再来里惯撮空。姐道郎呀。你侬九十日春光弗会着子奴一日个肉。我只爱你来无形迹去无踪。
　　一云。结识私情好像风。娇滴滴个鲜花吃你采子红。姐道郎呀。我只道你飘扬心性吹得过。弗匡你一场云雨便成空。亦可。
　　［花］
　　姐儿生来像花开。花心未动等春来。囫囵囵两瓣只消得一滴清香露。日里含羞夜里开。
　　［砚］
　　砚台姐原是牢石人。吃个墨池里郎来污子我个身。拿介管乌弗三白弗四个笔来捉个小阿奴奴千万牖得我漕中水尽便休停。
　　［笔］
　　姐儿青青白白像笔能。再搭个书房里伴结私情。恁你亲夫拘管得紧。管定子头来管弗得身。
　　［棋］
　　收子象棋着围棋。姐道我郎呀。你着着双关教我那亨移。零了中间吃郎打子辘轳结。结来结去死还渠。
　　［又〕
　　收子围棋着象棋，石炮当头防两肋车。我只道你双马饮泉叉起子个羊角士，啰道你一卒钻心教我难动移。
　　［双陆〕
　　情哥好像双陆能，吃渠把住子们儿教我那亨奔。
　　姐道郎呀，我因为你个贪赢让你拿个中心来做实子，那你还多呵故迟跌打弗停身。
　　［骰子］
　　结识私情像骰子，吃郎君灌铅着药弄得骨头轻。要快要缓只在奴心里，你弗要呼吆喝六惊动子外头人。　　［又〕
　　结识私情没像个骰子能，随人抛掷骨头轻。我当初只道你红红绿绿是介件赢钱货，啰得知你滚来滚去到是一个老妖精。
　　［投壶］
　　结识私情像投壶。一箭两箭专在孔窍上做工夫。姐道郎呀。你没要过门不入来我面上做惯子个样缩手势。我听你斜插花强似以多为胜赌中壶。一云。姐儿生来爱投壶。也弗来输赢上底做工夫。当初只学得一个杨妃睡。那间又会子雁衔芦。
　　［球］
　　结识私情像气球，一团和气两边丢。姐道郎呀。我只爱你知轻识重随高下。缘何跟人走滚弄虚头。
　　［毽踢］
　　结识私情像个毽踢能。个个顽皮精脚脚来搭卖风情。姐道郎呀。我搭你刮起之时再无介脚野脚吃个星轻脚鬼来拾子去。冷天光也要吃你累得汗淋身。
　　［鹞子］
　　情哥郎瘦骨凌层好像鹞子能。生来薄幅独取尔个点有风情。姐道郎呀。那你说子风情就要飞得起介去。我有介条软麻绳缠子了弗放你就番身。
　　［香筒］
　　姐儿生来像香筒。身上花描肚里通。姐道郎呀。常点子中三更两更你个火心还弗退。直弄到心灰意懒眼朦胧。一云。结识私情像香筒。外头花巧里头空。郎做子红柄线香插着子我个孔。未曾动火眼朦胧。略同。
　　［荷包］
　　结识私情像荷包。出出进进只爱你个口儿牢。姐道我郎呀。你有子铜钱银子但凭你阁来呵。只没要无钱空把布裙嚣。
　　〔毡条〕
　　结识私情像毡条，伏伏帖帖枕席做相交。姐道郎呀，奴当初是一条囫囵鲜红真好货，
　　罗道：你蛀成虫子大洞便相抛。
　　［帐］
　　结识私情像个帐子能。生来飘拽动人心。姐道郎呀。我听你遮后遮前私房两个自快活。罗怕外头有奢恶风声。
　　［睡鞋］
　　结识私情好像鞋子能。帮帮衬衬费子许多心。看你行作动步只道你勤来往。
　　罗道：你黄昏头脱子直到大天明。
　　［珠］
　　结识私情好像珠子般。圆圆一粒望你眼儿穿。姐道郎呀。你弗来时我枕边吊落子千千万。没要因奴黄子了贱相看。
　　［海青］
　　结识私情像海青。因为贪裁契郎着子身。要长要短凭郎改。外夫端正里夫村。
　　［算盘］
　　结识私情像个算盘来。明白来往弗拔来个外人猜。姐道郎呀。我搭你上落指望直到九九八十一。罗知你除三归五就丢开。
　　［厘等］
　　结识私情好像厘等能。浑身扭捏侪是假星星。姐道郎呀。只有吃个硬壳乌龟拘管得我介紧。无钱弗放我自开门。
　　［消息子］
　　我里情哥郎好像消息子能。身才一捻骨头轻。进来出去能即溜。教小阿奴奴关着子毛头便痒杀人。
　　［扇子］
　　结识私情好像扇子能。骨清面白有风情。间边有画弗知个边个字。上头箍紧下销钉。
　　［网巾圈］
　　结识私情要像个网巾圈。日夜成双一线牵。两块玉合来原是一块玉。当面分开背后联。
　　［又］
　　结识私情没要像个网巾圈。名色成双几曾做一连。当初只道顶来头上能恩爱。如今撇我在脑后边。
　　［夜壶］
　　结识私情像夜壶。无冷无热捉我半夜里。姐道郎呀。一遭两遭弗知应子你多少个急。教阿奴奴肚皮大子好难过。
　　［粪箕　］　
　　结识私情像粪箕。只没要搭个苕帚两个做夫妻。我里两人侪是个样劈竹性。蓦地里奔来就有子泥。
　　［烟条］　
　　姐儿生来蔑条长介像烟条。情哥郎当面就得牢。吃渠用力勤抽屑满子我个肚。害奴奴遍身夜夜火来烧。
　　［蜡烛］　
　　姐儿生来好像蜡烛能。煎熬到底一条心。姐道郎呀。我黄昏夜晚滴子若干个风流泪。再无面前背后弗光明。
　　［　灯笼］　
　　结识私情像灯笼。千钉万烛教你莫通风。姐道郎呀。你暗头里走来那了能有亮。引得小阿奴奴火动满身红。　
　　［走马灯］　
　　结识私情好像走马灯。吃你拨动个机关再来里斗斗能。一时间火发吃你骗得团团转。如今再高阁在暗头里子弗分明。
　　［箸］
　　姐儿生来身小骨头轻。吃郎君捻住像个快儿能。姐道郎呀。我当初金镶银镶吃个篾片阿哥弄成了我个轻薄样。撞来尽盘将军手里弗会停。
　　［茶注］　
　　结识私情好像茶注能。冷热温炖待子多少人。我为子你个冤家吃子多少苦。了你前头清爽后来浑。
　　［酒钟］　　
　　结识私情好像钟子能。里头光滑外头青。只有贪杯着子郎个手。吃郎亲亲啧啧再斟斟。
　　［　攒合］　
　　结识私情好像攒盒能。逢着酒荡紧随身。就是一碟两碟略尝滋味自有多少个趣。你没要快儿头触动子弗留停。
　　［鼓］　
　　结识私情鼓一般。钉紧子个张皮弗放宽。姐道郎呀。放下子鼓槌我劝你少擂子遭罢。漏子风声教我亨瞒。
　　［爆杖］　
　　情哥郎燥暴好像爆杖能。逢人动火只为你有个散漫个名。姐道郎啊。你动轧霹拍之声耍了能响快。小阿奴奴借尔个凶势头好去吓乡邻。
　　［流星］　
　　结识私情像流星。到处钻天忒煞轻。姐道郎呀。小阿奴奴粹得火着介欢喜子你。那了你一道狼烟就无处寻。
　　〔伞〕　
　　结识私情好像雨伞能，上头云雨下头晴。姐道郎呀，你对孔一插直掮来肩头上，两手撑开水直淋。
　　〔又〕
　　结识私情好像雨伞能，瞒子天天我里私下晴。姐道郎呀，个样有天无日头个事你也弗要怕，我听你撑开篾片下销钉。
　　〔又〕
　　结识私情没要像个雨伞能，只图云雨弗图晴。拨出子销钉放下子个手，浑身骨解水淋淋。墨斗〕姐儿好像墨斗一般般，吃情哥揿住子奴身只捉眼来看。姐道郎呀，我线路上来原来线路上去，从弗曾走差斜路惹包弹。
　　〔吊桶　〕
　　结识私情像个吊桶能，一时枯得便来寻。姐道郎呀，我只撞弯子腰来际凑子你，那你越捉我颠颠倒倒弗停身。一云：“姐儿生来好像吊桶能，吃个篾片圈留缠住子身。我娘呀，你上箍下箍箍得奴介紧，投河奔井若条绳。
　　［粽子］　
　　结识私情像个粽子能。济楚衣裳到是糯米心。姐道郎呀。撞你介个馋痨捉我剥得精出子。一连两个正救子肚饥人。
　　［粽子〕结识私情像个粽子能，济楚衣裳到是糯米心。姐道郎呀，撞你介个馋痨捉我剥得精出子，一连两个正救子肚饥人。
　　〔馒头〕
　　姐儿胸前有介两个肉馒头，单纱衫映出子咦像水晶球。一发发起来就像钱高阿鼎店里个主货，无钱也弗肯下郎喉。　钱高阿鼎，吴中馒头店之有名者。
　　〔又〕
　　结识私情像个馒头能，道是无心也有心。郎道姐呀，我为你面生受子多呵浑闷气，那间没要拍破子面皮弗认真。
　　〔面筋〕
　　姐儿生来紫糖色了像面筋，惹人团挼惹人蒸。姐道郎呀，小阿奴奴是个主热烘烘新出笼个清水货，你没疑心我麸多弗作成。
　　〔荸荠茨菇〕
　　郎替娇娘像荸荠，荸荠要搭茨菇两个做夫妻。茨菇叶生来就像姐儿两膀当中个主货，荸荠心透出也像情哥郎个件好东西。
　　［香圆］　
　　结识私情像香圆。那了你面皮黄瘦皱漫漫。当初只道是暗老沉香滚得过。弗匡你悦团团满肚是尖酸。
　　〔茶〕
　　结识私情好像茶叶能，团圆一娄有收成。姐道郎呀，我嫩蕊经汤把旗枪儿来放倒，啰知你年年弃旧又尝新。一云：“姐儿生得矮婆娑，好像南山老茶棵。日里吃郎扯来拽，夜里凭郎挼来挪。
　　［梅子］
　　姐儿像个梅子能。嫁着子介箱郎君口软阿一介弗爱青。姐道郎呀。我当初青春翠翠那间吃你弄得黄熟子。弗由我根由蒂瓣骂梅仁。
　　［茄子］　
　　姐儿光头滑面好像茄子能。爱穿青袄紫罗裙。虽是霜打风吹九秋末后像子个黄婆子。还有介星老瓢身分惹人寻。
　　［夜合花］　
　　约郎约到夜合花。那了夜合花开弗见来。我只指望夜合花开夜夜合。罗道夜合花开夜夜开。
　　［葵花］　
　　姐儿好像蜀葵能。胸中一片是丹诚。姐道郎呀。我捉你当子天上日头一心只对子你。你没要阴晴无准弗照阿奴心。
　　［蟋蟀］　
　　姐儿生得紫堂色好双黑眼睛。有人绰号白牙青。郎道姐呀。你只怕牵着子大头长脚真三色。斗得你牙钳放解直姜姜倘在尺中心。
　　〔跋弗倒〕
　　郎有介件东西像个跋弗倒个能，光头滑面又像个老寿星。姐道我郎呀，看你翘上翘下能硬挣，只怕你纸糊头当弗起我个水淋淋。
　　［船］　
　　结识私情像支船。竖起子帆竿浪里颠。姐道郎呀。个样风水小阿奴奴常经惯。你只要挡牢子个舵梗莫贪眠。
　　［又］　
　　郎把舵。姐撑篙。郎若撑时姐便摇。姐道郎呀。逆水里篙只要撑得好。郎若头歪奴便艄。
　　［又］　
　　郎撑船。姐摇船。耍样风潮有介多呵颠。姐挡子橹牙全靠郎打水。郎越撑篙姐越欢。
　　［篷］　
　　小阿姐儿随人上落像个一扇篷。拿着紧处弗放松。去时罗管回头日。眼前且使尽子一帆风。
　　［钓鱼船］　
　　结识私情好像钩鱼船。命犯子个风波终日浪里颠。姐道郎呀。我弗合上子你个钩儿吞子你个钩。那更挽住子个香腮凭你穿。
　　［鱼］　
　　一对乌背鲫鱼在荷花池里做鸳鸯。吃个黑鱼游来赶散子场。只有个油嘴条在搭团团里看。鳜鱼肚里气膨膨　。
　　［鼠］　
　　同郎困到一更天。老虫哥再来帐外数铜钱。小阿姐儿吃个听弗过了捉个情郎一脚踢觉子。你个困猫团那了只贪眠。　
　　（卷六咏物四句）
●山歌卷七（私情杂体）
○笃痒（中带说白一句）
姐儿笃痒无药医，跑到东边跑到西，梅香道姐儿拾了弗烧杓热汤来豁豁，姐道梅香呀，你是晓得个，热汤只豁得外头皮。此哥闻之松江傅四，傅亦名姝也，松人谓阴为笃。
○田鸡（中带急口四句）
百样鸟儿百样声，只有青花样个田鸡叫得忒分明，半夜三更跳来小阿奴奴南纱窗前荷花缸根头，金丝荷叶上，高叫三声，低叫三声，说道阁来呵，阁来呵，再搿搿，再搿搿，叫得小阿奴奴小肚子底下膝馒头上的手掌大介一搭，痛弗痛，痒勿痒，好像杨六使将军征子九溪南蛮十八洞，得胜回朝系在绿杨树底下个匹红鬃白马个鼻头歇歇里介动，又像个隔年破伞水淋淋。
○上桥（急口八句）
郎上桥，姐上桥，风吹裙带缠郎腰，好个阵头弗落得雨，青天龙挂惹人膘，惹人膘，惹人膘，小阿姐儿再来红罗帐里造仙桥，若有村东头，村西头，南北两横头，二十後生边垂头，肯来小阿奴奴仙桥上过，怕郎君落水抱郎腰。
○摆祠堂（以下俱八句）
万苦千辛结识子个郎，我郎君命短见阎王，爹娘面前弗敢带重孝，短短头梳袖里藏，袖里藏，袖里藏，再来检妆里面摆祠堂，几遍梳头几遍哭，只见祠堂弗见郎。
○借个星（个星，吴语，犹云这仲东西也。）
郎听姐儿借个星，半个时晨弗做声，白绢汗衫掩子嘴唇迷迷里介笑，线札羊毛笔定成，必定成，必定成，待奴奴归去禀娘声，娘道囝儿呀，看子我老来无人要，你後生家及早做人情。
好个令堂，与一卷二十去子廿一来只同意。
○吃樱桃
日落西山影弗高，姐担子竹榜打樱桃，打子四九三十六个樱桃安来红篮里，要郎君摸奶吃樱桃，吃樱桃，话樱桃，嫌奴奴拉闸手鏖糟，小阿奴奴金盆洗子银盆里过，白罗帕子转三遭。
摹写郎骄姐诌可笑可憎。
○船艄婆
船艄里打铺船舱里齐，船稍婆一夜忒顽皮，吃个船舱里客人听得子，朝晨头侪对子我笑嘻嘻，笑嘻嘻，笑嘻嘻，亏你昨夜冉阝忍得到晓鸡啼，小阿奴奴私房本事侪吃你听会子去，只怕你搭家婆到弗得我介会顽皮。
○约（以下中犯皂罗袍四句）
栀子花开心里香，情哥郎约我到秋凉，梧叶乱，桂花又香更更做梦，Ａ１Ａ１思量，姐道郎呀，你有口无心没许子我，教奴奴冉阝得介慢心肠。
○咒骂
我情郎一去好希奇，轻夏过秋再弗归，当初来往是谁请你，如今撇我，被人说是讲非，姐道郎呀，个样事对人前说弗得也有天知道，我只顾夜夜烧香咒骂渠。